El grupu de folk-fusión de La Pola L.lena La Col.la Propinde ta acabante publicar A teyavana, el so tercer trabayu discográficu, onde combinen cantares tradicionales reellaboraos con composiciones nueves, y qu'amás cuenta nún de los cantares cola collaboración de la cantante Esther Fonseca.
La Col.lá Propinde vuelve a inundar l'espaciu musical n'Asturies, esta vez gracies a «unes lletres y unos sones allugaos a los cuatro vientos, como si d'una nueche de branu se tratara, componiendo idees al rellumu de les estrelles filtraes nel llar baxu les ripies y les teyes del cumal», según esplica’l grupu nuna nota de prensa.
A teyavana grabóse nos estudios Tutu ente mayu y setiembre, cola producción de Sergio Rodríguez y Ánxel González. Ye un discu con doce cantares onde se combinen los de reellaboración tradicional y los de composición propia del grupu. De los primeros destaca «Yo pa qué me casaría», un cantar tradicional de L.lena, y ente los segundos una muestra ye «Skanciu», trabayu que combina los sones celtes col ska. A más, nesta ocasión, el grupu cuenta cola collaboración de Esther Fonseca, que pon voz en «2417». Na trayectoria de La Col.lá Propinde, destaca'l premiu al meyor cantar n'asturianu nel añu 2003 por «L'emigrante». Nel añu 2009 fueron banda sonora de la serie de Antena3 Doctor Mateo.