La banda l.leniza La Col.lá Propinde punxo nel mercváu estos díes el so trabayu discográficu nuevu, A teyavana (Algamar Producciones), que fai’l númberu tres na so carrera.
La grabación, mezcla y masterización fíxosese en Tutu Estudios (Los Campos, Corvera) pol productor Sergio Rodríguez. La llinia que sigue l’álbum ye l’avezada nesta formación: folk-rock allegre y contundente. La novedá vien de la mano de la voz, yá que cásique toles pieces son, nesta ocasión, cantaes, con títulos como «Frexulfe», «Ska-nciu», «La escopeta al l.lumbu» o «La Fuxaca». Precisamente una de les sos señes d’identidá ye l’emplegu de la variedá de la llingua asturiana falada nel conceyu de L.lena. Musicalmente, xunto a los seis músicos que formen La Col.la Propinde, aparez la collaboración d’Esther Fonseca, vocalista que-y pon voz al cantar «2417».
La Col.lá Propinde fundóse a principios del añu 2000 en La Pola (L.lena) col propósitu de facer un folk que, ensin alloñase de les bases de la música tradicional asturiana, s’averare a sonoridaes más rockeres. Tienen grabaos hasta’l momentu dos trabayos discográficos, de títulos L.l y Güeria, y ta previsto que’l próximu 29 de xineru se presente esti A teyavana con un conciertu pequeñu na FNAC de Parque Principáu.