REDACCIÓN. UVIÉU - La banda asturiana La Col.lá Propinde va actuar el xueves 19 de xunetu, a les 21.30 hores, na espicha-conciertu selmanal qu'organiza la sidrería Tierra Astur de Cualloto. Formáu a primeros del añu 2000, La Col.lá Propinde fai una música basada nel repertoriu tradicional asturianu, al qu'enriquez con otros estilos musicales que van del pop al rock, el ska o'l reggae.
N'avientu del 2003, la banda editó col sellu L'Aguañaz el so primer discu, Ḷḷ. Dientro d'esti trabayu atópase'l tema «L'emigrante», que foi escoyíu como meyor cantar d'aquel añu n'Asturies. El so segundu trabayu discográficu, Güeria, llegó en xineru del 2006. Nesti elepé, el grupu, depués de pasar per dellos cambios nos sos componentes, muestra una evolución importante y un soníu más propiu y arriesgáu en comparanza col trabayu anterior, lo que-y valió un éxitu notable ente'l públicu y la crítica.
La fusión de la música tradicional con estilos contemporáneos ye tamién la nota dominante nel so tercer discu, A teyavana, grabáu nel 2009 nos Estudios Tutu de Corvera, con producción de Sergio Rodríguez y Ángel González. Ente los doce temes d'esti trabayu puen alcontrase pieces de la tradición oral y popular asturiana, como «Ánimes del purgatorio», xunto a cantares de composición propia y temática estremada, como los amores imposibles de los que fala «La escopeta al l.lumbu» o dellos retratos biográficos urbanos, tal qu'asocede nel tema «Perende».
La fusión de la música tradicional con estilos contemporáneos ye tamién la nota dominante nel so tercer discu, A teyavana, grabáu nel 2009 nos Estudios Tutu de Corvera, con producción de Sergio Rodríguez y Ángel González. Ente los doce temes d'esti trabayu puen alcontrase pieces de la tradición oral y popular asturiana, como «Ánimes del purgatorio», xunto a cantares de composición propia y temática estremada, como los amores imposibles de los que fala «La escopeta al l.lumbu» o dellos retratos biográficos urbanos, tal qu'asocede nel tema «Perende».