La Col.lá Propinde: trazos d'hestria d'una banda l.leniza


La Col.lá Propinde ye un grupu de folk asturianu formáu a finales del añu 2000. Dende'l comienzu, el grupu va garrando diferentes sonoridaes procedentes del repertoriu tradicional asturianu, enriqueiéndoles con otros munchos etilos musicales ente los que podemos destacar el pop, rock, ska, reggae,... pero siempre ensin alloñase de les bases tradicionales y raigaños celtes, biltando nueves alternatives con un soníu frescu, movíu y mui comprometíu coles realidaes sociales.


La banda asturian tien tres discos asoleyaos, dos col sellu discográficu L'Agüañaz: "L.l" (Che) nel 2002 y "Güeira" en 2005. Y con Algamar Producciones, el discu "A teyavana", nel añu 2010, el so últimu trabayu. Toos foron grabaos y producíos en TUTU Estudios, baxo la dirección de Sergio Rodríguez.

En xunetu de 2001, el grupu participa nuna grabación por primer vez, nel discu "L'asturianu vive, la llucha sigue" editáu pola Xunta Moza y Discos L'Agüañaz, producíu por Paco Loco en ODDS Norte (Xixón), al llau d'otres bnades del panorama folk y rock asturianu. El cantar incluíu foi "L'emigrante". Un añu depués, vendría'l so primer album, "L.l" (Che). Discu debut que foi too un ésitu poles sos composiciones y soníu frescu. Nel 2003, el cantar "L'emigrante", incluyíu nesi discu, algama'l galardón de meyor cantar n'asturianu del añu.

Tres numberosos conciertos, en payares de 2005, ún de los temes que diba tar metíu no que fuere'l so segundu discu , "Suena'l camín", foi la Banda Sonora Orixinal del curtiumetraxe "Sueña'l Camín", ganador del certame "Nun me cuentes películes, failes"´entamáu porl Conseyu de la Mocedá del Principáu d'Asturies, dientro de la 43 edición del Festival Internacional de Cine de Xixón. Nel curtiu esbíllase la escena musical asturiana d'angüaño y les torgues poles que pasen los grupos y bandes. Ésto sería l'adelantu del so segundu trabayu discográficu, "Güeria", espublizáu en xineru de 2006. En Güeira, la fusión fáise entovía más ppresente cola música tradicional asturiana en cantares como "Llandellena", "Milenta", "Cuerri pal monte",... y dedicáu a toles persones que viven y trabayen nel campu. Too un homenaxe al mundu rural. Esi mesmu añu continuen los conciertos y la xira "Güeira". Participen tamién nuna collaboración col raperu y productor musical Dark la eMe, en su discu "Chigre y Dragón", nel cantar "mi compromisu".

Durante'l 2007, ún de los temes de "Güeria" ("Güeira remix"), foi seleccionáu como la sintonía de la 51 Edición de la Vuelta Ciclista a Asturies. Nesi mesmu añu, La Col.lá Propinde participa nel discu homenaxe a la mítica banda asturina "Dixebra", que lleva por títulu "Perversiones, ¡SALÚ YA DIXEBRA!". versioneando "Bail.la'l mileniu" xunto a una riestra de bandes del mundu rock y folk asturianu.

El grupu estrénase nel mundu de la imaxe durante esi mesmu añu, editando y grabando lo que foi'l so primer video-clip, sacáu d'un de los temes más pidíos na escena, "Llandellena", cantar basúa nuna hestoria real, recoyía nel pueblu asturianu que lleva'l memsmu nome. El trabayu foi dirixíu por Delfo (La Tarrancha y K-Nalón) y grabáu y editáu por Pablo Quiroga (Algamar Producciones).

Yá nel 2008, la banda l.leniza vuelve a colocar música del so segundu discu na serie de televisión "Doctor Mateo" (Notrom Films y Antena 3)

En plena grabación del so tercer trabayu, la banda ye convidada a collaborar nel programa de la Televisión Pública Asturiana (TPA) "Camín de Cantares", dirixíu por Xose Antón "Ambás", dedicáu al gaitiru de Carabanzo. La propuesta viose espeyada na reellaboración de dos pieces tradicionales de la música asturiana del repertoriu del gaitiru: "a lo l.lixero" y "la muñeira", tema col que La Col.lá Propinde punxo zarre a la quinta temporada del programa, nuna grabación pal mesmu.

En xineru del 2010, La Col.lá presentó el so tercer trabayu discográficu tituláu "A teyavana", grabáu y editáu nos Estudios TUTU, producíu por Sergio Rodríguez y "GLT", dientro d'una aventura nueva pal grupu: Algamar Producciones, con Pablo Quiroga. "A teyavana ye un discu cola mesma tónica dominante, la música asturiana y la fusión. Too ello, xunto a cantares onde les voces son cada vez más afayadizas y notorias, da como resultáu doce temes donde podemos atopar pieces de la tradición oral y popular asturiana: "Yo pa qué me casaría" o "Ánimes del purgatoriu" hasta cantares de composición propia de temática variada como amores imposibles "la escopeta al l.lumbu", retratos biográficos urbanos "perende", ...mezclao con música y melodíes tradicionales. El discu cuenta cola collaboración d'Esther Fonseca, quien canta el cantar dedicáu a la xente que-y presta la montaña "2417", cantar nomináu a los AMAS 2011, xunto a "Llárimes" que foi el cantar nomináu a los Premios de la Música.

Nes navidaes del mesmu añu, el grupu aprovechó pa grabar el so segundu video-clip, de la mano de Algamar Producciones y Señor Paraguas. Pa ello escoyeron el cantar "Llárimes", espublizáu nel discu "A Teyavana".

La presentación del clip foi, el primer de los actos de los diez años de la banda, con un conciertu fiesta na Sala Acapulco del Casino de Xixón, onde aprovecharon pa repasar la so trayectoria musical con munchos collaboraores, amigues y amigos: Esther Fonseca, Rodri Sturm, Delfo, L.lubu, Montoto y gaiteros de la banda de Gaites de Mieres, xente de La Curuxa y del Sabil con "Queco" al frente,... y nello tán, en dir faciendo conciertos al rodiu los diez años de la banda, con esi espíritu combativu y peragradeciós, por tola xente que día tres día, fai que'l proyectu Propinde, siga furrulando.

A por otros diez...

SALÚ