El sábadu 22 de xineru, a partir de les 22:00 hores, na Sala Acapulco (Casinu d'Asturies) de Xixón, el grupu de folk-fusión La Col.lá Propinde va dar un conciertu col que quier festexar el so décimu aniversariu. Nél van facer un repasu de los temes más sonaos de los sos trés discos editaos hasta'l momentu. Amás, van contar cola collaboración de dellos músicos que van ayudalos na interpretación.
Nel trescursu del conciertu va presentase'l so videoclip nuevu, nel que ponen n'imáxenes el cantar tituláu «Llárimes», estrayíu del so últimu trabayu discográficu, A teyavana(Algamar Producciones, 2010).
La Col.lá Propinde fundóse a principios del añu 2000 en La Pola (L.lena) col propósitu de facer un folk que, ensin apartase de les bases de la música tradicional asturiana, s’averara a sonoridaes más rockeres. Tienen grabaos hasta agora trés trabayos discográficos, de títulos L.l, Güeria y A teyavana.