El domingu 28 de marzu, a les 19.30 hores, nel Teatru Vital Aza de La Pola (L.lena), el grupu de folk-rock La Col.lá Propinde presenta en directo’l so últimu trabayu discográficu, A Teyavana (Algamar Producciones).
L'álbum inclúi doce pieces onde la composición propia entemezse cola reellaboración tradicional. Nesta ocasión, La Col.lá Propinde cuenta cola collaboración d'Esther Fonseca, que pon voz al cantar «2417». A teyavana grabóse nos estudios Tutu (Los Campos, Corvera) ente mayu y setiembre del 2009, cola producción de Sergio Rodríguez y Ánxel González.
La llinia que sigue l’álbum ye l’avezada nesta formación: folk-rock allegre y contundente. La novedá vien de la mano de la voz, porque cásique toles pieces son, nesta ocasión, cantaes, con títulos como «Frexulfe», «Ska-nciu», «La escopeta al l.lumbu» o «La Fuxaca». Precisamente una de les sos señes d’identidá ye l’usu de la variedá de la llingua asturiana falada nel conceyu de L.lena.